這個IG有許多簡單的食譜:)

糖醋南瓜雞扒

材料
雞扒 2塊
南瓜 1/3個
乾辣椒 3-4條
蒜頭 3-4粒

醬汁
生抽 1湯匙
茄汁 1湯匙
糖 1茶匙
醋 1湯匙

鹽 適量
黑椒 適量

做法
1) 將雞扒解凍至室溫，用淡鹽水浸15分鐘去除雪味，然後用廚房紙巾印乾水份
2) 印乾水份之後，用適量既鹽同黑椒醃15分鐘黎比小小底味，然後切成一口大細
3) 將南瓜洗乾淨表面，然後切成一片片既薄片；乾辣椒同蒜頭切碎
4) 開中火燒熱鑊，然後將雞扒有雞皮既一片向下煎香至金黃色，然後再煎另一面
5) 只要兩面表面都金黃色就可以拎起備用；留返少少煎雞出黎既雞油係鑊中
6) 加入乾辣椒同蒜蓉炒香，然後放入南瓜片
7) 炒約3分鐘左右至南瓜表面有小小溶身，加入生抽茄汁同糖，繼續用中火炒香
8) 放入煎好既雞扒，炒勻後可以半蓋上鑊蓋去焗一焗腍南瓜
9) 最後起鑊前加入醋炒勻即可

泰式生菜包

係食泰國野既時候，好多時都會叫個生菜包黎食下，貪佢又有菜又有肉，唔洗食咁多澱粉質但係又夠飽肚。不過好多時係街食生菜包，唔單止賣得貴，仲要得個一兩塊生菜，次次都食得唔夠喉，大家不妨可以跟下依個食譜，好簡單就可以整到一碟大大份又好食既生菜包

材料

免冶豬肉 400g
生菜 1-2棵
乾蔥 4-5粒
蒜頭 3-4粒
辣椒 1條
香矛 1條
檸檬葉 4-5片
芫茜 1-2棵
油蔥酥 大量

調味料
魚露 1湯匙
糖 1茶匙

做法
1) 將生菜撕成一片片，洗乾淨然後晾乾水備用
2) 將乾蔥，蒜頭，辣椒切碎 ; 香予拍開，撕走第一層然後切大段；檸檬葉切絲 
3) 芫茜洗乾淨然後切細，分開根部同葉兩部份
4) 中火燒熱鑊，加入一湯匙既油，先炒香香矛，芫茜根同埋乾蔥
5) 炒香後放入免冶豬肉，由佢平鋪係鑊面煎至兩面金黃色
6) 然後加入蒜頭同辣椒炒香，再倒入所有調味料炒勻
7) 最後上碟前放入檸檬葉絲，芫茜葉同油蔥酥炒勻即可

剝皮辣椒炆雞

今次介紹依一個台灣既菜式，係台灣黎講非常普遍，而且做法真係超級簡單，只需要買到一種材料，就算唔係識煮野食既都可以煮到一碟非常之送飯既菜式。秘密就係一樽 - 剝皮辣椒，只要煮個陣連埋汁落半樽，保證煮完出黎之後飯都食多兩碗

材料
雞扒 2塊
剝皮辣椒 半樽
薑片 3-4片
蒜頭 8-10粒
蔥 2-3條

調味料
紹興酒 1湯匙
豆瓣醬 1湯匙
蠔油 1湯匙

做法
1) 將雞扒解凍至室溫，用淡鹽水浸15分鐘去除雪味，然後用廚房紙巾印乾水份，再切成一口大細
2) 將蒜頭去皮拍開即可；蔥切粒，分開蔥白同蔥花；薑去皮切片
3) 開中火燒熱鑊，然後將雞扒有雞皮既一片向下煎香至金黃色，然後再煎另一面
4) 煎另一面既同時可以放入薑，蔥白同蒜頭等佢同時爆香，爆完後可以倒走多餘既雞油，留返少少油係鑊中
5) 加入紹興酒，豆瓣醬同蠔油，炒勻所有食材
6) 炒香後加入半樽剝皮辣椒連汁，轉中細火慢慢炆煮約8-10分鐘
7) 最後曬上蔥花即可上碟

香煎鴛鴦魚餃

今次又同大家介紹一個好簡單既食譜，只需要15分鐘左右就可以整到，而且出黎個賣相仲要非常吸引，仲可以揀自己鐘意既魚滑去做，作為派對或者送酒小食亦都一流

材料

墨魚滑 半磅
鯪魚滑 半磅
餃子皮 30片
可以隨自己個人喜好揀要雙面定單面，雙面會比較脆口，單面個賣相就吸引啲

做法
1) 將墨魚滑同鯪魚滑用匙背慢慢平均咁搽係餃子皮既表面
2) 如果想要雙面既再用另一片餃皮放上搽好既魚滑上面
3) 開中火，加入2湯匙油，先將餃子皮既一面向下煎香至金黃色
4) 然後反轉另一面再煎多2-3分鐘至金黃色即可
5) 煎既時候可以用鑊鏟壓住黎煎，令到煎出黎既魚餅可以做到一塊堍扁身

乾免冶牛肉飯

本身自己都唔知有依味餸既存在，只係有一次係網上面見到原來免冶牛肉飯都有分乾同濕就好奇想試下，原來乾免牛係澳門黎講係一碟非常普通既碟頭飯，係好多既茶餐廳都可以食到，做法唔難，成個餸最難就係炸完啲薯仔之後要忍住唔好偷食

材料
免冶牛肉 400g
薯仔 2個
洋蔥 半個
乾蔥 3-4粒
蒜頭 3-4粒

調味料
蠔油 1湯匙
豉油 1湯匙
老抽 1茶匙
紹興酒 1茶匙
糖 1茶匙
生粉 1茶匙
胡椒粉 適量
麻油 適量

做法
1) 將乾蔥，蒜頭切碎 ; 所有調味料撈勻，然後加2湯匙落牛肉入面醃15分鐘
2) 將薯仔去皮切粒，放入水入面；將洋蔥切成同薯仔差唔多大小
3) 將薯仔洗走表面既澱粉後，用廚房紙印乾水份
4) 中大火燒熱一鑊油，用160度左右炸薯仔粒3-4分鐘至熟透後撈起
5) 再用大火(180度)左右炸多1分鐘至薯仔粒金黃色及脆身後撈起晾乾
6) 中火燒熱2湯匙油，放入免冶牛肉，由佢平鋪係鑊面煎至兩面微焦後拎起
7) 同一隻鑊放入洋蔥，乾蔥同蒜頭炒香，再倒入免冶牛肉
8) 加入剩返撈好既調味料，再放入薯仔粒，大火炒勻
9) 最後上碟前可以加入蔥粒，再配多隻太陽蛋就完成

看照片都覺得很好吃，謝謝分享

沙薑手撕雞長通粉

成日食開茄汁，卡邦尼，青醬意粉已經食到悶，不妨可以係屋企試下今次既食譜。將沙薑雞同埋長通粉煮埋一齊出黎既效果都唔錯，比起食開一般既意粉有一種新鮮感，做法亦都唔難，有興趣既可以試下

材料
雞 半隻 (可以用雞扒雞胸代替)
長通粉 200g
洋蔥 半個
蒜頭 4-5粒

調味料
沙薑粉 2-3湯匙
鹽 1荼匙
胡椒粉 1茶匙

做法

1) 將雞解凍至室溫，用中火隔水蒸15分鐘，然後拎出黎攤凍備用
2) 將調味料部份撈勻，再加入3-4湯匙蒸完雞既雞汁搞勻
3) 雞放涼之後，用手將雞肉撕成一條條，加入1-2湯匙調味料撈勻
4) 洋蔥切條，蒜頭切成蓉備用
5) 煲滾一大煲水，放入大量鹽，放入長通粉，根據包裝上既指示再減2分鐘煮熟長通粉
6) 中火燒熱鑊再加入1湯匙油，放入洋蔥同蒜蓉炒香
7) 加入1-2湯匙沙薑粉，再放入一半既雞絲，炒勻後加入1湯殼意粉水
8) 將煮好既長通粉放入，倒埋剩返撈好既調味料，炒勻即可
9) 最後放上剩返既雞絲，芫茜葉係面即可